Breve Grammatica de Interlingua

Interlingua non usa marcas de accento. Le accento tonic cade quasi sempre super le vocal ante le ultime consonante. Pro facilitar vostre lectura, in casos exceptional nos sublineara le vocal tonic.

Le grammatica de Interlingua, in contrasto con illos de altere "linguas international", es tamben basate super un evalutation objective de illo que es de facto international, non super illo que le theoricos pensa que deberea esser international. Como Gode e Blair diceva: "...cata characteristica grammatical que es incontrate in tote le linguas-fontes essera retenite in le grammatica de... [Interlingua]; o negativemente, necun characteristica grammatical essera retenite si illo es absente in al minus un del linguas-fontes." Un resultato attractive e felice de isto es que, durante que le grande internationalitate del parolas europee ha date a Interlingua un vocabulario que non exige apprension, le internationalitate defective del finales grammatical lo ha fornite un grammatica de extreme simplicitate.

Articulo

Le articulo definite es le:

le casa
le casas
le libro
le libros

a + le = al
de + le = del

Le articulo indefinite es un:

un casa
un libro

Substantivo

Le plural termina in -s. Post cononante, -es. Un parola con singular in -c face plural con -ches.

un catto, duo cattos
le vision, le visiones
le zinc, zinches

Adjectivo

Le adjectivo non concorda in genere o numero con le substantivo que illo qualifica.

bon matre
bon filio
bon casas
bon libros

Le adjectivo pote apparer ante o post le substantivo:

incredibile notitias
notitias incredibile

Le adjectivo pote reciper le -s del plural si le substantivo es absente:

Io apprecia camisas azur; mi sposa prefere le verdes.

Adverbio

On deriva adverbios a partir de adjectivos per le addition de -mente o, post un final -c, -amente:

grande, grandemente
felice, felicemente
physic, physicamente

Obviemente, il ha varie adverbios "primari" que non es derivate de un adjectivo:

troppo fatigate
sempre de mal humor

Pronomines personal

Subjective	Objective	Post preposition	Possessive
io	me	me	mi(e)
tu	te	te	tu(e)
ille masculin	le	ille	su(e)
illa feminin	la	illa	su(e)
illo* neutre	lo	illo	su(e)
il* impersonal	—	—	—
on* indeterminate	uno	uno	su(e)
nos	nos	nos	nostre
vos	vos	vos	vostre
illes	les	illes	lor(e)
illas	las	illas	lor(e)
illos*	los	illos	lor(e)

Illo(s) se refere a cosas o animales cuje sexo es incognite:

Mi casa? Illo es belle.

Il es usate in constructiones impersonal:

Il pluve.
Il ha un problema.
= Un problema existe.

On es usate pro persona indeterminate:

On parla francese in Belgica.
= Francese es parlate in Belgica.

Il ha duo formas de possessivo. Le forma plus curte es usate ante le substantivo e sin articulo.

mi casa, mi grande casa

In altere casos, on usa le forma plus longe:

le mie casa
Deo mie!
Tu casa es major que le mie.

Verbo

In le conjugation del verbos il non ha terminationes personal. Le verbo assume solmente 7 formas differente, de accordo con su termination (-ar, -er, -ir):

Infinitivo	cantar	creder	partir
Presente & Imperativo	canta	crede	parti
Passato	cantava	credeva	partiva
Futuro	cantara	credera	partira
Conditional	cantarea	crederea	partirea
Participio Presente	cantante	credente	partiente (non partinte)
Participio Passate	cantate	credite (non credete)	partite

Alcun rar verbos in -er forma participio presente con -iente.

reciper — recipiente

Le infinitivo pote esser usate como substantivo; le participios como adjectivos:

le volar del aves
= le volo del aves
un influentia predominante
le anno passate

Le verbos esser, haber e vader habe formas alternative in le presente:

es = esse
ha = habe
va = vade

Le verbo esser habe altere formas alternative:

es = esse
son = esse (plural)
era = esseva
sera = essera
serea = esserea

Sia es le imperativo e subjunctivo de esser:

Sia felice!
Io non crede que ille sia folle.

On pote formar tempores perfecte con le verbo haber e un participio passate:

io ha parlate
ille habeva vidite

On pote formar le voce passive con le verbo esser e un participio passate:

Le joco es vidite per milles de personas.
Isto essera facite per me.

Iste duo verbos pote esser miscite in formationes plus complexe:

Quando ille arrivara, su vestes ja habera essite lavate.

Como leger Interlingua

Le pronunciation de Interlingua es multo similar a italiano o espaniol. Casos que merita nota:

ca, co, cu como ka, ko, ku.
ce, ci, cy como tse, tsi, tsi.
ch como k (machina); eventualmente como (t)sh.
g gutural, mesmo ante e, i, y (portugese); eventualmente como j ante e, i, y, specialmente in le suffixo -age e derivatos (mangiar, viage, viagiar).
h aspirate; optionalmente mute.
ph como f.
qu como ku; como k in le parolas que, qui.
rh como r.
s inter vocales como z (casa).
th como t.
ti eventualmente como tsi (national, scientia, spatio).
w como u o v, de accordo con le origine del parola.
y como i.