Pois que Christo ha suffrite in le carne, ergo arma vos etiam de iste mesme pensata, que ille qui ha suffrite in le carne ha cessate con le peccato,
a fin de viver le tempore que vos resta in le carne, secundo le desiderios de Deo e non plus secundo le concupiscentias del homines.
Pois que es sufficiente haber sequite in passato le voluntate del Gentiles vivente in luxuria, concupiscentia, ebrietate, gluttonias, e abominabile idolatrias.
E illes trova extranee que vos non curre plus con illes al recerca del luxuria, e ergo illes vos maledice.
Sed illes rendera ration a Ille qui es prompte pro judicar le viventes e le mortos.
Pois que per iste ration le Evangelo esseva annunciate etiam al mortos; a fin que anque illes pote esser judicate como le homines in le carne, mais viver secundo Deo in le spirito.
E le fin de tote le cosas es proxime; sia dunque vos prudente e vigilante in oration.
E supertoto, habe vos mutual caritate, perque le caritate coperi multitude de peccatos.
Sia vos hospital sin murmurar.
Como bon administratores del multiplice gratias de Deo, cata un, secundo le dono que ha recipite, lo usa al servicio del alteres.
Si uno parla, que lo face como annunciante oraculos de Deo; si uno exerce un ministerio, que administra con le virtute de Deo, a fin que in omne cosa sia glorificate Deo per medio de Jesus Christo, al qual pertine le gloria e le dominio in le seculos del seculos. Amen.
Carissimos, non vos meraviliar del tentationes que veni a vos como un fornace ardente pro probar vos, como si un cosa extranee vos adveni.
Al contrario, jubila vos per esser participe del suffrentias de Christo, a fin que etiam al revelation de su gloria vos potera exultar e gauder.
Si vos es vituperate per le nomine de Christo, beate vos! perque le Spirito de gloria, le Spirito de Deo, reposa super vos.
Nemo de vos pati como homicida, o robator, o malfactor, o per ingerentia in questiones alien;
ma si uno suffre como christiano, non si debe avergoniar, mais glorificar Deo portante iste nomine.
Iste es le tempore quando le judicio comencia per le casa de Deo; e si illo initia per nos, qual essera le fin de illes qui non obedi al Evangelo de Deo?
E si le justo con difficultate se salva, ubi apparera le impie e le peccator?
Ergo anque illes qui suffre secundo le voluntate de Deo, que commenda lor animas al fidel Creator, facente le ben.
